Pairin (vanan), Maraat (koduvo mantad vanan) om Tracey (tanga)
minonginam taakanon koubasanan Mogiigizon Kadazan Dusun Murut i pinosuung, id lamai dino.
29th May, 2011 (Sources:Newsabahtimes)
KENINGAU: Taakanon koubasanan mogisusuvai tinau id pogun diti hoohobi no kozo mogiigizon Kadazan Dusun kitangazan montok posondiion, ka di Kumoduvo Vozoon Montili Tan Sri Joseph Pairin Kitingan.
Minoboos isido, iti saasabap no do taakanon koubasanan toi ko nansakan tuhun kampung kivaa loso soosondi nga kakal okuang popobuu i maganu kosivatan popisondii nansakan koubasanan kinoizonon id lahan totuhid montok posuungon id restaurant ngavi toi ko hotel.
“Nung mongoi tokou id kampung ngavi, ogumu okito tokou taakanon kavo diti om mononoodo dino nopo nga mantad tuhun ngavi guuguhu i pointantu no do ogumu toihaan. Miaga do pomitanan dino, taakanon koubasanan nonsom sada, tuhau, soko, loun mundok, homiding om ogumu po di suvi.
“Saviavi kohombusan diti au po noukab poimponu dino kumaa nazatan mintingisan om nung uangan, pointantu no do kaanu manaak hoogo koposondiaan om guhi di togumu,” ka disido.
Minoboos isido dino ontok pinopoimagon do kalamazan Taakanon om Unduk Ngadau Keningau Mall 2011 kopiondot lamai kaamatan om Kopomuuvan Koponuhungan Tuhun Au Kadansaan (OKU) naazu miampai Parti Bersatu Sabah (PBS) Boogizan Sook, Keningau Mall om Kounsol Uvang Keningau, id Keningau Mall, di koniab .
Nokotindapou nogi Huguan Boogizan PBS Soo, Datuk Bernard S Maraat om sanganu do Keningau Mall, Tracey Liew.
Pairin i nogi Montili Kotundaan Kouhanan otumbazaan, nansakan koubasanan i babaino kaanangan saviavi mogiigizon mositi do pointutunon okon nopo ontok timpu kalamazan nga nositi posuungon id restoran ngavi om hotel tu ino kaanu mamagazat kaanangan tutumombuhui kumaa pogun diti.
“Kalamazan kaamatan pinopokito katabazan dotokou montok tuutulus momogompi om popoguhi vagu asil toihaan koubasanan, kaampai no nansakan koubasanan mooi au opunso oduanan timpu.
“Otumbazaan zou nansakan koubasanan mogiigizon poinsandad id pogun diti aanu popoinsavat gisom id nazatan di hobi kinavas om adadi pini taakanon kopoguhu id restoran toi ko htel ngavi id pogun diti,” ka disido.
Minoboos i Pairin, miampai kivaa pongkimamaan potihombus montok popointutun nansakan koubasanan id pogun diti, pointantu no do kaanu monongkiahi miampai nansakan suvai i tuutulus dino adadi pihi taakanon poimbida i adadi kointutunan mogiigizon Malaysia.
“Lati dino id nombo nopo tokou, id Sarawak po toi ko id Semenanjung, kaanu tokou momoloso nansakan dotokou id tampat ngavi dino,” ka disido.
Kokomoi miampai kobuuon id Keningau, minoboos isido, Keningau babaino nakahaang no kumaa timpu kotundaan kobobo id siibo kopolint aan Barisan Nasional (BN).
Ka disido, vookon kotundaan i aanu mongintong babaino diti nopo nga kapanadaan louting Hongkod Kinuama Hongon Sabah, louting Kounsol Kakadazan Keningau om kapanadaan talun alun duvo pamanaan mantad Hamin Pongusapan Keningau gisom kumaa Kampung Bukiau.
“Kouhanan ngavi dino nopo nga asil kosianan kopolintaan montok tuutulus mamadadi uvang diti di poimbubuu id boogizan sokid.
“Au nodii ahaid, kampus Univositi Teknologi Mara (UiTM0 todoon id uvang Sook om timpu di miaga diti nogi iso vagu sikul takavas agama kivaa asrama penuh tuidongon id Kampung Mempakit Laut,” ka disido.
Minoboos nogi i Pairin, ino pinopokito pilotian kopolintaan id suang popobuu pomitanan tuhun id lahan totuhid mzaa kotundaan balajalan.
“Saviavi projik ngavi kitanda tagaso i noboos ku diti vookon no mantad pomitanan asil pongkimamaan kopolintaan popobuu uvang sokid om Keningau hoohobi no kozo sabaagi hongkod balajalan id siibo palan Koridor Kotundaan Sabah (SDC) om otumbazaan zou nung layat tuutulus monokodung pongkimamaan kopolintaan diti, Keningau adadi vookon uvang di poimbubuu id pogun diti.
"Bosou Tuhau om Lombiding"
(A song about the traditional Kadazandusun foods. A song dedicated to all Sabahans in Sabah, peninsula Msia or abroad! Enjoy!)
