(NewSabahTimes in Kadazan Dusun 24th May, 2011)
KENINGAU: Kopolintaan Hongkod hobi vinasi dino manaak kotumbazaan kumaa kopolintaan Sabah montok mangazu kalamazan Lamai Kaamatan nazatan Kabangsaan, ka di Kumoduvo Vozoon Montili Tan Sri Joseph Pairin Kitingan.
Minoboos isido kinahantazan pongozuvan Lamai Kaamatan id potitikid kohimpupuson kalamazxan i lamazon ontok ko 30 om 31 Vuhan Kohimo potitikid toun mositi poinsavaton miampai onuan ningkokoton sabaagi Lamai Kaamatan nazatan nasional.
“Monongkotohuod tokou kumaa Kopolintaan Malaysia tu minanaak ningkokoton Lamai Kaamatan sabaagi kalamazan nasional, om naazu impiipio no id Hamin Poingukab Lamai Kaamatan kabangsaan, nga ino nopo nga naazu nopo id lamai misuvai,” ka disido ontok minamason id Lamai Kaamatan nazatan uvang Keningau id Arked kakadazan Keningau.
Pairin, i nogi Huguan Siou (buuan takavas mogiigizon Kadazan Dusun om Murut), minonoimo tavasi atag Speaker Dewan Koundangan Pogun Sabah Datuk Seri Salleh Tun Said Keruak mooi kopolintaan Hongkod manaak ningkokoton Lamai Kaamatan nazatan pogun i maan lamazo ontok 31 Vuhan Kohimo potitikid toun, sabaagi kalamazan nazatan kabangsaan.
“Atag dotokou nopo nga mooi abaabazan hamin poingukab (kabangsaan) dino ozuvon id timpu di miaga miampai koponoimaan di kivaa no haid babaino diti i ozuvon do kopolintaan pogun ontok ko 30 om 31 Vuhan Kohimo potitikid toun,” ka disido.
Pairin, i nogi Polosiden Koisaan Koubasanan Kadazan Dusun (KDCA), mangatag mooi koponoimaan kagazat kalamazan Lamai Kaamatan ontok ko 31 Vuhan Kohimo id nombo abaabazan ponutuban todoon sondii di Yang Dipertua Negeri Sabah poinsavaton sabaagi do kalamazan nazatan di hobi kinavas.
